Damelaget knuste Åsane 2: eit hinder unna opprykk til 2.divisjon!
– Det skal ikkje vera mogleg! Vi vann ved å visa aggressivitet og råskap, sa trenar Ørjan Sandal etter kamp.
(Foto: Kjetil Vasby Bruarøy, Midtsiden)
Os/Nore Neset held fram med å imponere, og sørga sundag for ein ny festkveld på Kuventræ. Etter eit knepent 1-0 tap i det fyrste oppgjeret, slo damene våre kraftig tilbake og knuste Åsane 2 i returoppgjeret. No er damene eit hinder unna opprykk til 2.divisjon!
Før oppgjera mot Åsane 2 meina trenar Ørjan Sandal at laget nærast stod ovenfor ein umogleg oppgåve. Men etter eit sterkt borteresultat i fyrste kamp såg han, saman med resten av laget, ein gyllen moglegheit. Kunne det umoglege vere mogleg?
For ingenting er nemleg umogleg for våre damer! Med ein enorm laginnsats, vinnarvilje og råskap, knuste damene våre Åsane 2 i returoppgjeret på Kuventræ - til ein euforisk stemning på tribunen!
Lenea Hjelle Fløysand, som blei kåra til dagens osing, sendte damelaget i føringa frå straffemerket. Og før jubelen var lagt seg blant dei mange frammøtte på tribunen, var Vy Mai Nguyen på farten. Hurtigtoget auka til 2-0 - Åsane 2 var rysta, og laga gjekk til pause!
Sandal seier laget var førebudd på eit stormløp frå Åsane 2 frå start i 2.omgang, men dei skulle svare med same mynt. Den strategien fungerte glimrande!
Etter innlegg frå kaptein, Thale Strønen Skeie, klara også Nora Abrahamsen Skjeie å finne vegen til Åsane 2 sine nettmasker - 3-0 var eit faktum! Åsane 2 makta aldri å slå tilbake, og Os/Nore Neset kunne dermed juble for avansement til det siste sluttspelet om opprykk til 2.divisjon.
Speler avgjerande kampar 14. og 21. november
Som det beste laget i 3.divisjon i Hordaland, skal no damelaget møte det beste laget i Rogaland, samt Sogn og Fjordane. Motstandarane er Vidar frå Rogaland og Førde frå Sogn og Fjordane, og dei tre laga skal spele om to plassar til 2.divisjon i 2022.
– Vidar og Førde speler mot kvarandre søndag 7. november. Vi har kamp søndag 14. og søndag 21. november, ein heime og ein borte. Vi møter Vidar på Kuventræ og Førde på bortebane, men kven vi møter når blir avgjort etter at dei to andre laga har spelt, fortel Sandal.
Me gler oss til spennande opprykkskamper!
