Pressemelding: Vegard Leikvoll Moberg er ferdig som Os-spelar – trer 100% inn i administrasjonen
Foto: Ann-Kristin Røsbø, Hordalandsfotball
Etter ein lang karriere i toppfotballen, kom Vegard Leikvoll Moberg heim til Os i vinter, til stor jubel for alle i heimbygda. Familiefaren fekk arbeid som dagleg leiar i Os Turnforening, i tillegg til å spele for herrelaget. Eit halvår etter heimkomsten til Kuventræ, er det klart at han har spelt sin siste kamp for Os Fotball.
- Eg har kjent på litt slitasje, at det har vore krevande å kombinere jobb, familieliv og fotballen, og at det for min del gradvis har vokse eit større ønske om å bruke meir tid og energi utafor fotballbana. Etter dialog med klubben har me kome fram til at eg gjer meg som spelar og aukar engasjementet på det administrative i idrettslaget, som eg trur er bra for alle parter. Eg skulle sjølvsagt ønske at returen til Os blei kjekkare fotballmessig, men når situasjonen er som den er, er eg glad for utfallet. Eg ser spesielt fram til å tilbringe meir tid med familien, samt fokusere på å utvikle idrettslaget vidare, uttaler Vegard Leikvoll Moberg, som no kan fokusere på arbeidet med å vidareutvikle klubben på fulltid.
Vegard kan sjå tilbake på ein innhaldsrik og spennande karriere på fotballbana, som starta og sannsynlegvis også sluttar i gul drakt på Kuventræ. Tusen takk for innsatsen, så gler me oss til å utvikle oss vidare som idrettslag med Vegard sin erfaring og kompetanse også utanfor bana!
